Шымкент қаласындағы 125 High School мектебі жаңа ғимаратпен толықты. Заман талабына сай бой көтерген «UBT School» мектебінде жаңартылған білім беру платформасы аясында дәріс беруге барлық мүмкіндіктер қарастырылған. Сонымен қатар, робототехника, шахмат, би, ән, бейнелеу өнері үйірмелері үздіксіз жұмыс істейді.
Соңғы үлгіде салынған білім ордасы қажетті құралдармен толықтай жабдықталған. Бұл ретте, жаратылыстану бағытына аса мән беріліп, арнайы сыныптар ашылған. Мұндағы, дәріс бөлмелерінің тағы бір ерекшелігі Ұлы тұлғалардың есімдерімен аталуында. Олардың өмірі мен шығармашылығы жайындағы мәліметтерді QR код арқылы көруге болады.
Білім ошағында бүгінде 280 бала білім алуда. Олардың қатарын алдағы уақытта көбейту көзделген. Сұраныс жоқ емес, баршылық. Алайда, мектеп ұжымы оқушыларды арнайы тест арқылы қабылдайтындарын айтады. Сөйтіп, жоғары сынып оқушыларын ҰБТ тыңғылықты дайындайды. Нәтижесі, көңіл қуантарлықтай. Өткен оқу жылында екі түлек еліміз бойынша ең жоғары бал жинаса, 48 оқушы шет елдің үздіктер қатарындағы жоғарғы оқу орындарына шақырту алған. Айта кетейік, IELTS бойынша орташа 6,3 балға ие болып, өте жақсы көрсеткішке қол жеткізген.
125 High School мектептер желісінің алғашқысы 2019 жылы ашылған. Уақыт өте келе еліміздің өзге қалаларынан бой көтере бастады. Қазіргі таңда, Қазақстанның 9 қаласында барлығы 18 мектеп нәтижелі жұмыс істеп, еліміздің топ 100 мектебінің қатарына кірген. Биыл білім ордаларының қатарына тағы да 1 мектеп елордамызда орын таппақ.
Жалпы қала көлемінде 2025 жылға дейін 54 мектеп салу жоспарда бар. Биылдың өзінде 18 500 орынға арналған 18 мектеп пайдалануға тапсырылуда. Нәтижесінде үш ауысымда оқитын 4 мектептің мәселесі толығымен шешілді. 2023 жылға 9 мекеменің ғимараты күрделі жөндеуден өтті. Балалардың сапалы біліммен қамтылуы үшін жан-жақты шаралар атқарылып жатыр. Оқушылардың қауіпсіздігін қамтамасыз ету үшін білім беру ұйымдарына 100% арнайы талаптарға сәйкестендірілген бейнебақылау жүйелері, турникеттер, дабыл батырмалары орнатылып, Полиция департаментінің Жедел басқару орталығына қосылды. Сондай-ақ І-дәрежелі мамандандырылған күзетпен келісім-шарт түзілді.
