ШЫМКЕНТ: № 66 МЕКТЕП ОҚУШЫЛАРЫ ІІІ ТОҚСАНДА ӨЗ ҒИМАРАТТАРЫНДА ОҚИДЫ

Шымкенттегі Тұран ауданына қарасты Қазығұрт ықшам ауданындағы № 66 жалпы білім беретін мектеп ғимараты күрделі жөндеуден өтіп жатыр. 3 қабатты нысанның құрылыс жұмыстары 86 пайызға орындалған. Бұған қала әкімі Ғабит Сыздықбеков білім ошағын аралау барысында көз жеткізді.
Құрылыс жұмыстары биыл мамыр айында басталды. Іргетасы осыдан отыз жыл бұрын қаланған ғимарат 1 260 орынға лайықтап салынған болатын. Оқушы саны бүгінде екі мыңнан асты. Олар күрделі жөндеу жұмыстары толық аяқталғанша, үш мектепке бөлініп, дәріске барып жүр.
Аталған білім ұясының жай-күйімен танысқан қала әкімі тиісті басқарма басшыларына мердігерлердің жауапкершілігін арттыра отырып, ең алдымен, сапаға көңіл бөлу қажеттігін тапсырды.
Айтып өтейік, мектептің құрылыс жұмыстары желтоқсан айының ортасына қарай толық аяқталып, пайдалануға беріледі.
Үшінші мегаполисте 9 айдың қорытындысы бойынша 3 мектепке 2 000 оқушы орнын қамтитын қосымша ғимарат салынды. Оған қоса, жаңадан 20-ға жуық жекеменшік білім ұясы ашылды. Нәтижесінде қалада үш ауысымда оқу мәселесі толығымен шешілді.
Тарқатып айтсақ, №1 мектепке 600 орындық, №45 мектепке 300 орындық, №65 мектепке 600 орындық қосымша құрылыс жүргізіліп, ел игілігіне берілді. 4 мектептің ауласында типтік үлгідегі спорт алаңшалары ашылды. 9 ғимарат: 4 мектеп, 2 балабақша, 1 колледж, 2 арнайы мектеп-интернат күрделі жөндеуден өтті.
«Жайлы мектеп» ұлттық жобасы аясында 2025 жылға дейін 18 нысан салынады деп жоспарланған, оның 12-сінің құрылысы биыл басталды.
Қаладағы білім беру ұйымдары 100 пайыз арнайы талаптарға сәйкестендірілген бейнебақылау жүйелерімен, турникеттермен қамтылған. Қосымша ақпарат, 2023 жылдың 9 айының қорытындысы бойынша қала оқушылары халықаралық және республикалық білім сайыстарынан 93 жүлделі орынға ие болды. Химиялық-биологиялық бағыттағы Назарбаев Зияткерлік мектебінің 11-сынып оқушысы Қанат Серікбай 2023 жылы Белград қаласында өткен Еуропалық ЕgeO олимпиадасында күміс медаль иегері атанған болатын. Ал Арсен Сыдықов биыл Индонезияның Бандунг қаласында өткен Халықаралық IGeO олимпиадасында қола медальға ие болды. Сондай-ақ, Еуропалық ЕGeO олимпиадасының қола медаль иегері.