Елімізде мүгедектік тобын сырттай белгілеу бойынша пилоттық жоба басталды.
Оның мақсаты-пациенттер мен мамандарды қағазбастылықтан босату. Егер жоба тиімділігін көрсетсе, барлық мүмкіндігі шектеулі жандар құжаттарды қашықтықтан тапсыра алады.
Шымкентте 10 000-нан астам мүмкіндігі шектеулі жандар тұрады. Биыл олардың 3000-ы мүгедектік тобын сырттай анықтау жобасына қатысады.
Республикада сырттай мүгедектікті белгілеуге жататын 12 санат бекітілді. Олардың едәуір бөлігі онкологиялық аурулармен байланысты.
Мүгедектік тобын растайтын құжатты 2090 шымкенттік алды. Дәрігерлер пациентті тексереді, оған барлық құжаттарды, оның ішінде диагноздар мен талдау нәтижелерін дайындайды, 031, 033 нысандарын дайындайды және оларды жүйеде тіркейді. Адамның жеке деректері жария етілмейді.
Пилоттық жоба аясында Шымкентте 165 пациенттің өтініші кері қайтарылды. Негізгі себеп-қажетті құжаттардың толық емес пакеті. Мүгедектік тобын тағайындау процесі жетіспейтін мәліметтер базасына енгізілгеннен кейін қалпына келтірілуі мүмкін.
Бұл жобаға 44 медициналық мекеме қатысады. Олар құжаттарды қабылдайды және оларды жүйеде тіркейді. Ал құжаттардың талаптарға сәйкестігін республикалық деңгейдегі үш сараптама мекемесі тексереді.
Естеріңізге сала кетейік, Ұлттық қоғамдық сенім кеңесінің VI отырысында Мемлекет басшысы ерекше қажеттіліктері бар адамдар үшін барынша қолайлы жағдай жасауды, олардың инстанциялар мен қағазбастылық бойынша жүруін, сондай-ақ қызмет көрсетушілердің қызмет алушылармен байланысын болдырмауды тапсырды. Осы тапсырманы іске асыру аясында ҚР Еңбек және халықты әлеуметтік қорғау министрлігі Денсаулық сақтау мен Цифрлық даму, инновациялар және аэроғарыш өнеркәсібі министрліктерімен бірлесіп, Қазақстанның барлық 17 өңірінде пилоттық режимде медициналық-әлеуметтік сараптама жүргізудің сырттай форматы бойынша жоба іске қосылды. Мүгедектік тобын белгілеу бойынша қызмет алу үшін өтініш беруші тек тұрғылықты жері бойынша емханаға барып, қажетті тексеруден өтуі керек, ал қалған процестер Ақпараттық жүйелерді интеграциялау есебінен оның қатысуынсыз өтеді.
