ҚР Парламенті Сенатының депутаты Ләззат Қалтаева Шымкент қаласындағы «Тең қоғам» әлеуметтік қолдау орталығының жұмысымен танысты.
«Тең қоғам» әлеуметтік қолдау орталығы «бір терезе» қағидасымен 5 бағытта қызмет көрсетеді. Мұнда дәрігер мен психолог жұмыс істейді. Мүмкіндігі шектеулі азаматтарды жұмысқа орналастыруға баса назар аударылған.
Сондай-ақ, бұл жерде мүмкіндігі шектеулі азаматтар әлеуметтік порталдың қызметін өз бетінше алуды үйренуіне болады.
—Мүмкіндігі шектеулі азаматтарға қолдау көрсету – мемлекеттің әлеуметтік саясатының басым бағыттарының бірі. Бүгінде мемлекеттік жәрдемақымен қоса медициналық оңалту және ем түрлері көрсетіледі. Әлеуметтік портал арқылы көмекші құралдармен толық қамтамасыз етілуде. Оған қоса Парламентте мүмкіндігі шектеулі азаматтарды қорғауға бағытталған заңнаманы желтілдіру бойынша ауқымды жұмыс жүргізілуде. Сессияаралық демалыс кезінде осы жұмыстың нәтижесі қалай болып жатқанын көру үшін өңірлерді аралап жатырмыз, — деді сенатор.
Айта кетейік, халық қалаулысы қаладағы әлеуметтік қамсыздандыру, мүмкіндігі шектеулі азаматтардың өзекті сұрақтары және оларды шешу жолдары, әлеуметтік мәселелерлерді талқылауға арналған дөңгелек үстел мәжілісіне қатысты.
Шымкент қаласына іс-сапармен келген ҚР Парламенті Сенатының депутаты Ләззат Қалтаева №5 Аялы алақан арнаулы әлеуметтік қызметтер көрсету орталығында болып, аталған мекеменің жұмысымен танысты.
Сенатор балаларға арналған оңалту орталығына өзінің жоғары бағасын берді.
–Шымкентке келген соң қаланы біраз жаяу араладым. Бір қуаныштысы, шаһарда мүмкіндігі шектеулі жандарға мүмкіндігінше жағдай жасалыпты. Сенат депуттатары да қарап отырған жоқ. Мүгедектігі бар азаматтарды қоғамның тең мүшесі санау бағытында бірқатар заңдарды қабылдады, — деді Ләззат Молдабекқызы.
Айта кету керек, №5 Аялы алақан орталығында бүгінгі таңда 109 бала әлеуметтік қызметтің 8 түрін алуда. Олардың ішінде медициналық, педагогикалық және психологиялық көмектер бар. Ғимарат 2018 жылы пайдалануға берілген. Мұнда тірек-қимыл қозғалысы бұзылған 3-18 жас аралығындағы балалар мен жеткіншектер қажетті медициналық және әлеуметтік қызметтің барлық түрін тегін ала алады.
