Шымкент қаласында Мұғалімдер күнінің қарсаңында, “Үздік педагог-2021” республикалық байқауының қалалық және республикалық кезеңіндегі жеңімпаздары марапатталды. Салтанатты жиында Шымкент қаласы әкімінің бірінші орынбасары Шыңғыс Мұқан, қала мәслихатының хатшысы Бахадыр Нарымбетов ұстаздар қауымын “Мұғалімдер” күнімен құттықтап, байқау жеңімпаздарын марапаттады. Алғыс хат пен қаржылай сертификатын табыс етті. Байқаудың қалалық кезеңінен барлық өлшемшарт бойынша жоғары көрсеткішпен үздік деп танылған N90 дарынды балаларға арналған мамандандырылған мектеп-гимназияның тарих пәнінің мұғалімі, республикалық пәндік олимпиада, ғылыми жобалар конкурстарынан оқушылары жеңімпаз атанып жүрген, Ы.Алтынсарин төсбелгісінің иегері, озық тәжірибелі, жаңашыл ұстаз Есенбекова Күлімкөз Шірнебайқызы да марапатталды. Атап айтар болсақ, аталған білім ордасынан былтыр Табылдиева Айжан Темірханқызы “Үздік педагог-2020” республикалық байқауының қалалық кезең жеңімпазы, ал, мектеп директоры, тарих пәнінің мұғалімі, “Қазақстанның Еңбек сіңірген ұстазы” құрметті атағын тұңғыш иеленушілердің бірі Орынбеков Арман Шымбайұлы “Үздік педагог-2019” республикалық байқауының жеңімпазы атанып, “Әлем мұғалімі — 2020”, “Әлем мұғалімі — 2021” жаһандық сыйлықтарының іріктеу кезеңдеріне қатысқан еді. Осындай үздіктер ордасынан шыққан Күлімкөз Шірнебайқызын жеңісімен құттықтап, алдағы уақытта да тек биіктерден көрінуіне тілектеспіз!
