19 қазан — Құтқарушылар күні. Осы кәсіби мереке қарсаңында Шымкент қаласының Төтенше жағдайлар департаментінің ұйымдастыруымен баспасөз-туры және ашық есік күні өтті. Іс-шараға қалалық БАҚ өкілдері мен білім беру мекемелерінің оқытушылары мен оқушылары қатысты. Баспасөз турының мақсаты-құтқарушылардың қызметімен таныстыру және азаматтық қорғау саласының оң имиджін арттыру.
Сондай-ақ, ҚР Президенті Қасым-Жомарт Тоқаевтың жарлығымен «Ерлігі үшін» медалімен марапатталған құтқарушылар қызыл кілеммен өтті. Бұл көрініс жастарға жігер беріп, патриоттық сезімнің артуына себеп болды. Осылайша бүгінгі күннің батырларына ерекше құрмет көрсетілді.
Ашық есік күнінде төтенше жағдайларға қатысты техникалармен және құтқарушылардың күнделікті жұмысы таныстырылды. Іс-шара барысында құтқарушылардың жұмыс процесін көрсететін арнайы дайындалған көріністер де ұйымдастырылды.
Құтқарушылар күні жыл сайын атап өтілетін маңызды мереке. Бұл күн құтқарушылардың қиын әрі жауапты еңбегіне құрмет көрсетіп, олардың қауіп-қатерге толы қызметтерінің қоғам үшін қаншалықты маңызды екенін еске салады.19 қазан – Құтқарушылар күні. 1995 жылы Мемлекет басшысының Жарлығымен құрылған арнайы қызмет күні бүгінге дейін халыққа қалтқысыз еңбек етіп келеді.
Қазақстан тәуелсіздік алғанға дейін елімізде кәсіби апаттық-құтқару қызметі болмаған еді. Адамдарды, қоғамды апаттық жағдайдан құтқару жұмыстарын көбіне қоғамдық ұйымдар, құтқару бекеттері атқарып келді. Бұл қызметтің бір бөлігі милицияға жүктелді.
Міне, осындай мемлекеттік маңызы бар қызмет жүйесін жасау үшін 1995 жылы Қазақстан Республикасы Президентінің Жарлығымен Қазақстан Республикасының төтенше жағдайлар жөніндегі мемлекеттік комитеті құрылды. Осы құжат негізінде 19 қазан Құтқарушылар күні болып белгіленді.
Төтенше жағдайлар саласы үлкен жауапкершілікті талап етеді. Қауіпті қызмет кез келген тосын жағдайдың алдын алып, зардабын жоюға үлкен күш жұмсайды. Апатқа ұшырағандарды құтқарып, алғашқы жәрдем көрсетеді. Сол үшін де құтқарушылар қажетті құрал-жабдықтармен барынша жарақтандырылуы тиіс.
Бүгінде құтқарушылар төтенше жағдайларды жою жұмыстарына қатысуға дайын болу үшін арнайы, медициналық, психологиялық әзірлігін, авариялық-құтқару құрылымдарының құрамындағы қызмет дағдыларын үнемі жетілдіріп отырады.
Құтқарушылардың жұмысы өз өміріне қауіпті болып келеді. Дегенмен олардың алға қойған басты міндеті – халықтың тыныш өмірін, тұрмыстағы, өндірістегі қауіпсіздігін қамтамасыз етіп, апаттық жағдайға жол бермеу.
