Арнайы операциялар күштерінің 29 жауынгері алғаш рет күрең қызыл берет кию құқығын иеленді

Шымкенттің «Орда» полигонында Арнайы операциялар күштерінің 29 әскери қызметшісі жауынгерлік даңқтың, батылдық пен абыройдың символы болып табылатын күрең қызыл берет кию құқығына арналған біліктілік сынағынан сүрінбей өтті. Ал сынаққа болса 54 үміткер жіберілді. Олардың барлығы дене шынықтыру нормативтерін тапсырды, психологиялық және теориялық тестілеуден, сондай-ақ медициналық тексеруден өтті. Айта кетсек, сынақ барысында арнайы жасақтар марш жүгіріп, газтұмылдырық кию, залалды аумақпен төрт жүз метр жүріп өту, шартты объектіге жасырын жылжып бару, жаралылардың қанын тоқтату әдісін қолдану және оларды эвакуациялау нормативтерін орындады. Қарсыласпен атыс жүргізіп жатқанда оқ-дәрілерді жеткізу, таулы және сулы жерлерді жүріп өту эпизодтары да күрделі болды. Бұдан бөлек әскери қызметшілер атыс қаруынан ату дағдылары мен қоян-қолтық ұрыс техникасын көрсетті. Ерекше көзге түскен жауынгерлерді Қарулы күштердің Арнайы операциялар күштерінің қолбасшысы полковник Айдос Мырзахметов құттықтады. “Бұл Қазақстан Қарулы күштері тарихындағы алғашқы біліктілік сынағы. Сендер мықты ерік-жігерді, шыдамдылықты және төзімділікті көрсете отырып, осындай күрделі жолмен сыннан өттіңдер. Күрең қызыл берет кию құқығына лайық болу керек. Бүгін аса күрделі тапсырмаларды орындап, кез келген жағдайда әрекет ете отырып, алға қойған мақсаттарға қол жеткізуге болатынын дәлелдедіңдер”, – деді ол. Енді мұндай сынақтар жыл сайын өткізілетін болады, бұл аса күрделі міндеттерді орындау үшін Арнайы операциялар күштерінің кәсіби дайындалған әскери қызметшілерінің резервін құруға мүмкіндік береді.
28 қыркүйек пен 12 қазан аралығында Уэльсте (Ұлыбритания) өткен «Кембрий патрулі» беделді халықаралық жарыстарында десанттық-шабуылдау әскерлерінің әскери қызметшілерінен тұратын Қазақстан Қарулы Күштерінің командасы құрметті үшінші орынға ие болды. Жарыс бірнеше кезеңнен тұрды: 28 қыркүйектен 9 қазанға дейін жалпы жағдайға енгізу, қауіпсіздік шаралары, қару-жарақтың материалдық бөлігін зерттеу, сондай-ақ топография, тактикалық және медициналық дайындық бойынша сабақтар өтті.