Мемлекеттік қайтарымсыз гранттың үшінші легінде Business.enbek.kz порталына жалпы саны 1780 азаматтан өтініш түскен. Бүгін үміткерлердің өтініштерін қарау жөніндегі комиссия отырысы басталды.
25 қыркүйектен 5 қазан аралығында өтеусіз қаражат алуға ниетті азаматтар өздерінің жаңа бизнес -жобаларын комиссия алдында қорғайтын болады. Қоғам белсенділері, БАҚ өкілдері, кәсіпкерлер мен қоғам бірлестіктерінің өкілдерінен құралған комиссияның әрбір мүшесі үміткердің кәсіпті меңгеру деңгейіне, бизнес-жобалардың әлеуметтік әлеуеті мен қаржылай өміршеңдігіне, бәсекеге қабілеттілігі мен жаңа жұмыс орындарын құруына қарай бағалайды. Комиссия шешімі үміткердің порталдағы жеке кабинетіне жіберіледі. Ашықтық пен жариялықты қамтамасыз ету мақсатында комиссия отырысы қалалық Еңбек мобильділігі орталығының инстаграм әлеуметтік желі парақшасында тікелей эфир арқылы көрсетілуде.
Жалпы, Шымкентте биыл әлеуметтік осал топты азаматтарға арналған 400 АЕК көлеміндегі грантты жалпы саны 447 адамға беру жоспарланған. Жыл басынан бері өткізілген бірінші және екінші лектің нәтижесінде 228 азамат грант иегері атанды. Бұл жолы 219 азаматқа грант беру жоспарланған. Қаражат шикізат пен материалдарды, техникаларды сатып алуға байланысты шығындарға жұмсалады.
Еске салсақ, Шымкентте 2022 жылы мемлекеттен 400 АЕК мөлшерінде қайтарымсыз грант алып, бизнес-жоспарларын жүзеге асырған 1000-нан астам азамат жеке кәсіптерімен айналысуда. Олар жуырда «Арбат» алаңында ұйымдастырылған жәрмеңкеде қала тұрғындарына өз өнімдерін ұсынды.
Аталған іс-шараға қала әкімі Ғабит Сыздықбеков, мәслихат төрағасы Бахадыр Нарымбетов пен бірқатар мәслихат депутаттары қатысып, бүгінде өз кәсіптерімен айналасып отырған 200-ге жуық грант иелерінің бизнес-жобаларымен танысты. Кәсіпкерлер мал шаруашылығымен, тағам өнеркәсібімен, қызмет көрсетудің жекешелеген түрлерімен, қолөнер ісімен және жиһаз өндірумен айналысады.
Бастапқы бизнесті іске асыру мақсатында берілетін қайтарымсыз грант отандық, оның ішінде шымкенттік өнім көлемін арттыруға өз септігін тигізуде.