Шымкентте қала күні мерекесіне орай екі күнге жалғасатын «Balmuzdaq Fest» фестивалі басталды. Шымкент қаласы туризм және сыртқы байланыстар басқармасының ұйымдастыруымен өтіп жатқан іс-шараға қаладағы 35 кәсіпкер өтінімін білдірген. Оның ішінде, балмұздақ, салқын сусындар мен тағамдар бар. Қала үшін айтулы күнге орай гастрономиялық туризмді дамытып жүрген кәсіпкерлер балмұздақтардың сан түрін әзірлеп, мегаполис тұрғындары мен қонақтарына ұсынуда. Одан өзге, келушілер арасында конкурстық ойындар ұйымдастырылып, жеңімпаздар үшін сыйлықтар әзірленген. Онда ресторандарға арналған жеңілдіктер мен тегін тамақтану мүмкіндігі қарастырылған.
Шымкент қаласын еліміздің гастрономиялық орталығына айналдыру мақсатында жүзеге асқан фестивальде тіскебасарлар ғана ұсынылып қоймай, келушілер үшін концерттік және балалар үшін аниматорлық, ойын-сауықтық бағдарламалар дайындалған. Одан өзге, қыш-құмыра, аква грим жасаудан шеберлік сабақтары өтіп, «Шымкент шайы» таратылып жатыр. Аспаздар кәуап пісіріп, балмұздақ дайындауда өз құпияларымен бөлісуде.
Таңнан басталған іс-шара кешкі 20:00-ге дейін жалғасады. Кәсіпкерлер өз өнімдерін мерекелік күнде сату арқылы табыс көзін арттыруы күтілуде. Жалпы, іс-шараны жыл сайын дәстүрлі түрде өткізу жоспарланып жатыр.
Ұйымдастырушылардың пікірінше, «Balmuzdaq Fest» фестивалі қала күні мерекесі қарсаңында тұрғындарға, соның ішінде балақайларға көтеріңкі көңіл-күй сыйлаған ерекше шара болды. Кәсіпкерлердің де табысын арттыруға мол мүмкіндік жасады. Келешекте осындай шараларды өзге де салаларда ұйымдастыру жоспарлануда.
