Шымкенттік жас маман Сандуғаш Жапек “Жастар практикасы” бағдарламасымен қаладағы нөмірі 24-ші “Алма” бөбекжай-балабақшасында мейірбике болып жұмыс жасауда. Ол Түркістан медицина колледжінің түлегі. Арнаулы орта оқу орнын “Мейіргер ісі” мамандығы бойынша бітірген. Жас маман аталған мектепке дейінгі мекемеге 2022 жылдың сәуір айында жолданған. Бүгінде ол өзінің білімі мен еңбокқорлығының арқасында ұжымдағы әріптестерімен жақсы қарым-қатынас орнатып үлгерген. Жас маманның алдына қойған мақсаты да айқын.
— Оқуды тәмамдаған соң бірден “Жастар практикасы” бағдарламасына қатысуға бел буып қалалық халықты жұмыспен қамту орталығына бардым. Жұмыссыз жас ретінде тіркеліп, қажетті құжаттарды өткіздім. Көп ұзамай маған бөбекжай-балабақшасына жолдама берді. Жұмысым жақсы. Балалардың, қажет болса қызметкерлердің денсаулығын қадағалаймын. Алғашқы ем-домын жасаймын. Болашақта емханада жұмыс жасап, қала тұрғындарының денсаулығын жақсартуға үлес қосқым келеді, — дейді Сандуғаш.
Жалпы, “Жастар практикасы” бағдарламасы жастарға мамандығы бойынша тәжірибе жинақтауға зор мүмкіндік.
Айта кету керек, 2022 жылы аталған бағдарлама аясында 2000-нан астам жасқа жұмыс орындарына жолдама беру жоспарланған. Жыл басынан 1000-нан астам жас жолданып, олар мемлекеттік және жеке-меншік мекемелерде жұмыс жасап жатыр.
“Жастар практикасының” мерзімі — 12 ай. Жалақысы: 30 АЕК.
Бағдарламаға 29 жастан аспаған, “жұмыссыз” мәртебесі бар, ЖОО және колледжді 2020,2021,2022 жылы тәмамдаған (техникалық және кәсіби білім) түлектер қатыса алады.
